محدش هياخدك غيري.. والدة فتاة ضحية خطيبها السابق بأسيوط: موتها بـ 10 طعنات عشان فسخت الخطوبة

لقيت فتاة تدعى بسنت البالغة من العمر 17 عامًا، مصرعها على يد خطيبها السابق في مدينة أبنوب التابعة إلى محافظة أسيوط؛ وذلك بسبب انفصالها عنه ورفضها الرجوع إليه بعد خطبة استمرت لمدة 9 أشهر، فأقدم على طعنها 10 طعنات بالسكين، ثم ألقى نفسه من أعلى الطابق الخامس.

شاب ينهي حياة خطيبته السابقة في أسيوط

وقالت والدة المجني عليها: بنتي عملت إيه عشان يحصل فيها كده؟.. راحت غدر عشان قالتلي خلاص يا ماما مش عاوزة خطيبي عشان متفقناش سوا.. بنتي كانت زي البدر المنور والناس كلها بتحلف بأخلاقها.

وأضافت أن ابنتها كانت مخطوبة من المتهم ولكن لم يحدث توافق بينهما، فأخبرته أنها لن تستطيع أن تستمر في الخطبة ويجب أن تنتهي علاقتهما، قائلة: خطيبها المتهم قالها إزاي ما فيش حد هياخدك غيري.

وأوضحت والدة المجني عليها أنها بالفعل فسخت خطبة ابنتها من المتهم، وحضر الأخير إلى منزلهم وأخذ شبكة الذهب وجميع متعلقاته.

وتابعت: بنتي بعد ما فسخت الخطوبة قالتلي يا ماما أنا ارتحت ونفسي أخرج.. قولتلها ماشي يا حببتي هاجي معاكي ولبست طقم جديد ونزلت في الشارع استنتني.. فجأة سمعتها بتصرخ وبتقول الحقوني.. جريت على السلم عشان أروحلها لقيت خطيبها طالع على السلم وبيقول أنا هريح نفسي زي ما ريحتها.

وأشارت والدة المجني عليها إلى أنها فور أن رأت نجلتها مصابة بعدة طعنات ظلت تصرخ في الشارع، ثم فوجئت بخطيبها يلقي بنفسه من الطابق الخامس وسقط في الطابق الثالث، معلقة: المتهم فضل يخبط راسه في الحيطة وقالي خلاص أنا ريحتلك بنتك.. أنا مش عاوزة حاجة غير حق بنتي اللي اتضربت 10 طعنات.