لازم نفهم نفسنا.. وكله ماشي زي القطيع في رحلة تعيسة

الإثنين 06/مايو/2024 – 10:29 م

حلت أبلة فاهيتا ضيفة على الإعلامية سارة دندراوي في برنامجها تفاعلكم على قناة العربية، وتحدثت عن كتابها الجديد بعنوان أنا الذي ألفته مؤخرًا وهو أول كتاب تؤلفه.

وأهدت أبلة فاهيتا سارة  دندراوي كتابًا وقالت ممازحة: لابسة تيار من كريستال عصفور، وحطالك روج على الكتاب اللي بيحبه ظافر العابدين وما بيطلعش ولا في الهدوم ولا البوس.

أبلة فاهيتا تكشف سبب اتجاهها للتأليف

وسألت سارة دندراوي أبلة فاهيتا سبب تأليفها الكتاب لترد: أنا متعددة المواهب.. والست لازم يكون عندها طموحات وتطلعات وتطور من نفسها، وأنا من وقت أزمة الدولار ولقيت نفسي ملزمة أمارس أمومتي بالجنيه المصري وعينك ما تشوف إلا النور، اكتشفت أن الأمومة صعبة خالص ومش ليا خالص.

وأضافت أبلة فاهيتا: حالي مش عاجبني ولا عاجبني حال الناس، كله ماشي زي القطيع في رحلة تعيسة للبحث عن السعادة ومش سعداء، يتخطبوا ومش سعداء، ويتجوزا وبرضه مش سعداء، ويصرفوا وهاني مول وفي الآخر مش مبسوطين ويطلقوا ويقولوا مفهمناش بعض، طيب هتفهموا بعض إزاي وأنتم مش فاهمين نفسكم.

واضافت أبلة فاهيتا: البني آدم لازم يفهم الأول علشان يعرف نفسه، وإيه اللي يسعدها وإيه ما يسعدهاش، والكتاب اسمه أنا وهو رحلة ذاتية للبحب عن النفس ويمكن تلاقوا نفسكم.

وقالت سارة دندراوي إذا كانت تهدف للتريند من وراء هذا الكتاب لترد ساخرة: مين عمل كتاب.. صفاء كتبت مذاكراتها ولا أحلام عملت مجلد بألماظتها، وأنا مش بزاحم حد، وأنا دايما أدخل على مجال موجود وأسيب بصمتي، وقدمت قبل كده برامج والبرامج موجودة من أيام فرعون”.

وأكملت: البني آدم عامل زي الدولاب المكركب، كل فترة لازم تخشي جواه وتوضبيه، وتحطي الكراكيب على جمب وترمي الجزم اللي ملهاش لازمة، واللي مش عاوزاه ترميه من الشباك وتوضبي اوضتك وترجعي لنفسك تاني، والكتاب هو ده اللي هيظبط ويظبط الأوضة.

وسألت سارة دندراوي أبلة فاهيتا إذا كانت تهدف للنرجسية بسبب اسم الكتاب لترد: مش نرجسية والقارئ هو المقصود بكلمة أنا، ده كتابك إنت وكتاب خاص بالقارئ، وأنا عاملة إهداء لروحي، لأني ما حلتيش غير روحي هي اللي عايشة معايا ومستحملاني وبناخد وندي من بعض فميش عندي أغلى من روحي أهديها الكتاب.

أبلة فاهيتا تكشف من تريد أن تهديه الكتاب

وقالت أبلة فاهيتا ردًا على سؤال من الأشخاص الذين ترغب في إهداء الكتاب لهم: كل الناس محتاجة الكتاب، كل واحد لازم يوضب أوضته زي العربية توديها مركز الصيانة كل فترة هو الكتاب زي مركز الصيانة.. مش لازم تبقي متعددة زي غادة عبد الرازق علشان تحتاجي الكتاب كل الناس محتاجة الكتاب، وإحنا بنصوم كل سنة علشان ننضف نفسنا من السموم أهو الكتاب زي موضوع الصيام.

أبلة فاهيتا ترد على إشادة عمرو يوسف 

وردت أبلة فاهيتا على إشادة الفنان عمرو يوسف بها مؤخرًا في لقاء تليفزيوني قائلة: عمرو دايما لما يشيلني على كتافه بطوله الشاهق ده بياخدني في حتة تانية، لولا كندة بتيجي تنزلني.

وأضافت: أنا إنسانة مواجهة وأصعب حاجة إنك تواجهي نفسك وأنا بواجه نفسي بالحلو.. والسلبية هتجيب ليا إيه.. الناس ما يستهلوشي.. والكتاب رحلة ذاتبة للبحث عن النفس بدال ما تروح للدكتور نفساني، والواحد لازم يفضفض ولو مش عندك حد تفضفضي له فضفضي لنفسك أو على الورق ويمكن تتعرفي على نفسك وتحبيها. 

كما كشفت أبلة فاهيتا أنها تفكر في اقتحام عالم الفضاء في الفترة المقبلة: المرة الجاية هبقى رائدة فضاء، وحاجزة أول رحلة مع إيلون ماسك وهطلع المريخ، يمكن نلاقي هناك كائنات ألطف من البشر وعندي الممول اللي هيدفع لي فلوس الرحلة.

أبلة فاهيتا تعلن إطلاق كتابها في دبي

سبق أن أعلنت أبلة فاهيتا، إطلاق كتابها الأدبي الأول في معرض أبوظبي الدولي للكتاب، يوم 1 مايو، ونشرت أبلة فاهيتا فيديو ترويجي لكتابها، قائلة: كتبت كتابي أنا.. من وجهة نظر أبلة فاهيتا.. ترقبوا إطلاق أنا، أول كتاب للأديبة أبلة فاهيتا يوم 1 مايو 2024 في معرض أبوظبي الدولي للكتاب، في جلسة باستضافة الإعلامي عامر بن جساس الساعة 7 مساءً.