عروس الإسماعيلية صاحبة الفيديو الشهير تروي تفاصيل مفاجأة والدتها بحضورها عقد القران: فكرتها كرتون مش حقيقة.. ومقدرتش أمس دموعي

انتشر خلال الساعات الماضية مقطع فيديو لأم تفاجئ ابنتها العروس بحضورها حفل زفافها بـ الإسماعيلية، على الرغم من سفرها بالخارج، وسط إعجاب الكثيرين على مواقع التواصل الاجتماعي.

وكشف العروسان أحمد وسارة، تفاصيل مفاجأة أم العروس بحضور كتب كتاب ابنتها رغم عملها بالخارج، إذ قال أحمد فتحي، عريس الإسماعيلية، إن والدة زوجته تعمل ترزي حريمي، وبعد الخطوبة جاءتها فرصة عمل بالمملكة العربية السعودية فذهبت على الفور، مضيفا: هي مسافرة بقالها سنة، وكانت مصرّة نعمل حفل كتب الكتاب، وكنا مخططين إنها تبقى موجودة خلال الحفل، لكنها مقالتش لحد علشان تبقى مفاجأة للكل، ومكناش متوقعين نزولها.

وأضافت عروس الإسماعيلية: أنا مكنتش مصدقة نفسي لما شوفتها قدامي وفكرتها كرتون واقف قدامي.. وهي على طول معايا على الفيديو كول لكن فجأة لقيتها قافلة نت واختفت ودي أول مرة لكن متوقعتش بردو إنها تيجي.. وفستاني هي اللي مفصلاه وبعتاهولي من السعودية.. السفر كان غصب عنها وهي على طول كانت معايا.

واستكملت عروس الإسماعيلية: قبل كتب الكتاب كانت نفسيتي وحشة جدا لأن مامتي مش هتبقى معايا في يوم زي ده، لأنها على طول كانت معايا، فمكنتش باكل وكنت تعبانة نفسيا بسبب الموضوع ده؛ لإنها مش أمي بس دي صحبتي وكل حاجة ليا.