تعليق مفاجئ من كولر بعد فوز الأهلي ببطولة إفريقيا على حساب الترجي

الأحد 26/مايو/2024 – 12:26 ص

علق المدير الفني للنادي الأهلي مارسيل كولر على فوز الأهلي ببطولة دوري أبطال إفريقيا بعد الانتصار على فريق الترجي التونسي مساء السبت، على ستاد القاهرة الدولي.

تصريحات مارسيل كولر 

وقال كولر في المؤتمر الصحفي عقب نهاية المباراة: سعيد بالفوز واللقب والماتش كان صعب أمام منافس قوي ومحترم، وسيناريو الماتش خلانا في حالة حذر، وضيعنا فرص كتير، وعلى مدار 90 دقيقة كنا الأفضل، ولو في تركيز كنا هنسجل أكتر من هدف.

وتابع: لدينا مباريات قوية في الدوري المصري ويجب التركيز فيها خلال الفترة المقبلة، عارف أن جمهور الأهلي هايبتدي يقولي من دلوقتي البطولة الثالثة عشر يا كولر، الناس مش بتلحق تفرح أو مش بتعرف تفرح لأنهم عايزين بطولات، لكن لازم يعرفوا يفرحوا، وأنا مش بشبع بطولات ولا الجمهور هيشبع بطولات.

وأضاف: لاعبنا مباراة الترجي زي ما إحنا عايزين وكنا عايزين نسجل هدف في أول 15 دقيقة، عملت سيناريو للمباراة وبحفظ اللاعيبة كل السيناريوهات، وفي المباريات دي لازم نلعب بذكاء، والجمهور بيساندك، والترجي كان مستني فرصة واحدة للتسجيل عشان كده كان لازم يبقى فيه حذر، ولو كان فيه بعض التوفيق أمام المرمى كان ممكن النتيجة تبقى 2 و3.

وأكمل: المباراة كانت زي الشطرنج، وأجريت تبديلات عشان أقدر أمسك الملعب بشكل جيد، وفي النهاية عملنا مباراة ممتازة جدًا، بالنسبة للمدربين المباريات اللي زي كده بتكون ممتعة للمدربين لأنها بتكون تكتيكية أكتر، ولكن بالنسبة للمشجع بتكون مباراة غير ممتعة.

وأتم كولر تصريحاته قائلًا: البطولة كانت في مجملها صعبة جدًا في ظروف صعبة، ولعبنا البطولة كلها دخل فينا هدف واحد فقط، وفي نفس الوقت الترجي قدم بطولة قوية جدًا، وعنده فريق محترم جدًا، وفرقتين كبار وصلوا للنهائي وسعيد إننا كسبنا البطولة في النهاية.