كان ماشي بسرعة جنونية.. ورماهم في المستشفى ومسألش فيهم

الخميس 23/مايو/2024 – 11:19 م

كشف فهد نجل السيدة منال المصابة في حادث الفنان عباس أبو الحسن، تفاصيل الحالة الصحية لوالدته وكذلك زميلتها التي أصيبت معها في الحادث، مشيرًا إلى أن حالتها غير مستقرة.

الحالة الصحية لمصابة في حادث عباس أبو الحسن 

وقال فهد في تصريحات لـ القاهرة 24، إن حالة والدته متدهورة للغاية، مشيرًا إلى أن والدته تعاني من شرخ في قاع الجمجمة وكسر في الضلع الأيسر وكسر في الحوض وكسر في الأنف وكدمات في الوجه، معلقا: والدتي في حالة صعبة.. بتفوق ويجيلها إغماء.

وأضاف نجل السيدة المصابة في حادث عباس أبو الحسن: محدش من وقت ما دخلوا المستشفى بص عليهم، وسابوا الحساب ومشيوا، والسيدة الثانية المصابة صديقة والدتي وتوفيت إكلينيكًا.

 نجل مصابة في حادث عباس أبو الحسن: حطوهم في المستشفى ورموهم ومشيوا

وتابع: حطوهم في المستشفى ورموهم ومشيوا، المستشفى اللي دخلوا فيه بالشيخ زايد قعدنا من 7 لأربعة الفجر مش لاقيين عناية مركزة لأهلنا، ووهمونا أنهم هياخدوهم لمستشفى خاص آخر، وفي الآخر نقلوهم لمستشفى تاني في المهندسين، علشان والدتي تعمل إشاعة على جمسها لأن عندها كسر في الحوض وجسمها متدمر، محتاج تتشال وتتنقل كل شوية علشان تعمل إشاعة وده بيخلي الحالة تسوء بسبب التنقل، والحالة التانية مش قادرين يعملوا لها إشاعة علشان مفيش شيء مجهز في المستشفى هل ده منطقي؟

وأكمل: مش حقيقي إنهم حطوهم في رعاية على مستوى عالي، وحط 10 آلاف جنيه في حساب كل حالة، ومش طالب منه حاجة غير إن والدتي تقوم بالسلامة، ومش طالب حاجة من الدنيا، ومطلبناش تعويض ومش عاوزين إلا هما.

نجل الضحية: كان ماشي بسرعة جنونية والمنطقة للعبور 

وأردف موجهًا انتقاده لعباس أبو الحسن: والدتي مكانتش على المحور هي كانت خارجة من شغلها من بنك الشيخ زايد اللي في مول أركان من قدام التمثال، والمكان ده فيه مطب مكانش فيه سرعة وكان ماشي بسرعة جنونية والمنطقة منطقة عبور والناس كلها بتعدي منها، وإزاي حد ماشي على سرعة تلاتين هيخبط اتنين؟

واختتم: معايا شهود وهم صديق والدتي وشخص تاني وعامل الشاي اللي قصاد الحادثة، وكلهم شاهدين أنه كان ماشي بسرعة جنونية.